Aholi salomatligiga e’tibor deganda ko‘z oldimizga, avvalo, onalar va go‘daklar keladi. Ularni salomatligi nazorat qilinsa, maqsadga muvofiq bo‘ladi.

“Turmush” keng qamrovli tezkor profilaktik tadbiri doirasida, “Surxondaryo tajribasi” asosida Sho‘rchi tumani Tibbiyot bo‘limida, Onalar va bolalar salomatligini asrashga bag‘ishlangan yig‘ilish tashkil etildi. Unda viloyat hokimining o‘rinbosari, viloyat IIB Jamoat xavfsizligi xizmati Huquqbuzarliklar profilaktikasi boshqarmasi boshlig‘i o‘rinbosari, tuman Xotin-qizlar faollari va patronaj hamshiralar ishtirokidagi tadbirda onalik va bolalikni himoya qilish, bu borada mahalladagi xotin-qizlar va patronaj hamshiralar hamkorligida amalga oshirilayotgan ishlar xususida so‘z yuritildi.

Onalar va bolalar o‘rtasida kasalliklar profilaktikasi, ularni barvaqt aniqlash va sog‘lomlashtirish dasturlarini amaliyotga joriy etish, sog‘lom farzand tug‘ilishi, rivojlanishi bo‘yicha tushuntirish ishlarini kuchaytirish zarurligi ta’kidlandi.

To‘g‘ri ovqatlanish hamda jismoniy faollikni oshirishni targ‘ib etish, sog‘lom turmush tarzi ko‘nikmalarini shakllantirish hamda maqsadli skrining tadbirlari orqali kasalliklarning samarali profilaktikasini olib borish masalasiga ham e’tibor qaratildi.