Sariosiyo tumanidagi Mirzo Ulug‘bek mahallasi qizil toifadagi mahallalardan biri. Hududda kriminogen vaziyatni yaxshilash, mahallani "qizil" toifadan chiqarish, jinoyat va huquqbuzarlik sodir etilishiga yo‘l qo‘ymaslik borasida Surxondaryo viloyati Qo‘riqlash boshqarmasi xodimlari tomonidan profilaktik ishlar davom ettirilmoqda. Qo‘riqlash boshqarmasi rahbariyati, tuman IIB mas’ullari hamda mahalla "yettiligi" hamkorligida hududda kelib chiqayotgan jinoyatlar tahlil qilinib, fuqarolar bilan uchrashuvlar o‘tkazildi.

Aholi vakillarining fikr-mulohazalari va takliflari asosida ko‘p qavatli uylarga, ko‘chalarga kuzatuv kameralari, tashvish tugmalarini o‘rnatish ishlarini jadallashtirish, hududda nazorat reyd tadbirlarini olib borish bo‘yicha choralar belgilab olindi. Mahallada profilaktik hisobda turuvchi fuqarolar bilan suhbat qilindi.

Aholi gavjum joylarda qo‘riqlash xizmatining afzalliklari, ob’ekt va xonadonlarga o‘rnatilayotgan signalizatsiya vositalarining jinoyat va huquqbuzarliklarning barvaqt oldini olishdagi imkoniyatlari xususida targ‘ibotlar tashkil etildi.

Amaliy ko‘rgazma tarzdagi uchrashuvda barcha qo‘riqlash texnik vositalar haqida ma’lumotlar berilib, shartnoma asosida mazkur xizmatdan foydalanish tavsiya etildi.

Hududlarda bu kabi targ‘ibot-tashviqot ishlari izchil davom etmoqda.