Muzrabot tumanining "Guliston", "Bog‘i eram", "Fayziobod", "Mohiyat" hamda "Chegarachi" mahallalariga olib boruvchi ko‘prik belgilangan hajmdan og‘ir bo‘lgan yuk mashinalarining qatnovi bois ta’mirtalab ahvolga kelib qolganligi natijasida 4-sektor aholisi qolaversa bu yerdan o‘tib qaytuvchilar uchun juda katta muammo va tashvish tug‘dirayotgan edi.

Shu bois hududda istiqomat qiluvchi fuqarolar bir-necha yillar davomida ushbu muammoning yechimini hal etib berishlarini so‘rab tegishli idoralarga murojaat qilganlar.

Bugun esa xalqning azaliy orzusi ushaldi. O‘zbekiston Respublikasi Prezidentining 2022 yil 30 dekabrdagi PQ-465-sonli qaroriga asosan Muzrabot tumanida joylashgan 4R102 «Jarqo‘rg‘on sh.-Navbahor k.-Boldir k.-Kelif k.» avtomobil yo‘lining 62 km qismidagi ko‘prikni rekonstruksiya qilish natijasida zamonaviy tarzda yangi ko‘prik mustahkam qurilib, foydalanishga topshirildi.

Ochilish marosimida Surxondaryo viloyati hokimi Ulug‘bek Qosimov, Surxondaryo viloyati IIB boshlig‘i Abduvohid Ismoilov, tuman hokimi Abdurashid Ismailov, tuman sektor rahbarlari, tuman hokimi o‘rinbosarlari, tegishli tashkilot, korxona vakillari qolaversa, mahalliy aholi, nuroniy otaxonlar hamda mahalla faollari ishtirok etishdi.

Ochilish tadbirida viloyat hokimi Ulug‘bek Qosimov “ko‘pchilikning uzog‘ini yaqin qiluvchi ushbu ko‘prik barchaga muborak bo‘lsin!”- deya, tilak bildirdi. Bundan tashqari tadbirda so‘z olgan nuroniylar yangi qurilgan ko‘prik xalqqa uzoq yillar mobaynida samarali xizmat qilishini so‘rab duo qilishdi hamda ushbu ko‘prik qurilishida ishtirok etgan barchaga o‘z minnatdorchiliklarini bildirishdi.

Nuroniy otaxonlar ko‘prikni ochib beruvchi ramziy tasmalarni kesishib, uning birinchi foydalanuvchilari bo‘lishdi.

Loyihaning umumiy qiymati 2 mlrd 850 mln so‘mni tashkil etib, qurilish ishlari "Surxon servis baraka" MChJ tomonidan amalga oshirildi.