Prezidentimizning topshiriqlari asosida viloyatimizdagi eng og‘ir hududlardan sanalgan 4 ta mahalla tanlab olinib, keng ko‘lamli obodonlashtirish va bunyodkorlik ishlari boshlangan edi. Bugun ana shu mahallalardan yana biri, Muzrabot tumani markazidan 35 km uzoqlikdagi “Bog‘i eram” mahallasida ham qurilish va bunyodkorlik ishlari yakunlanib, aholiga foydalanishga topshirildi.

Mahallada “Obod xonadon, obod ko‘cha, obod mahalla” dasturi asosida 80 ta xonadonni ta’mirlash, 1 km davlat ahamiyatidagi, 1,7 km ichki yo‘llarni asfaltlash, 13,1 km tuproq yo‘llarni toshlash, 1 350 metr piyodalar yo‘lagi qurish, 7 ta transformator punktini ta’mirlash, 71 ta temir-beton ustunlar o‘rnatish, 4 km oqova suv tarmoqlarini qazish, mahalla uchun yangi idora va tikuvichilik korxonasi hamda hududdagi beshta mahallaga kirib boruvchi yo‘lda yangi ko‘prik qurish ishlari amalga oshirildi.

Dastur asosida bunyod etilgan, yangidan ta’mirlangan obektlarning foydalanishga topshirish tadbirida Surxondaryo viloyati hokimi Ulug‘bek Qosimov, Prezident davlat maslahatchisining birinchi o‘rinbosari Ulug‘bek Muhammadiev hamda viloyat IIB boshlig‘i 3 sektor rahbari Abduvohid Ismoilovlar ishtirok etishdi.

Mahalla ahlini yangilanishlar bilan muborakbod etgan viloyat hokimi, “Mehnat faxriysi”, “Tabiat himoyachisi” va “Eng yaxshi tibbiyot xodimi” ko‘krak nishonlarini o‘z egalariga topshirdi.

Shundan so‘ng, mahalla ahli uchun qo‘shaloq bayram shodiyonasi kuy qo‘shiqlarga ulanib ketdi, tadbir davomida Surxondaryo viloyati Ichki ishlar organlari xodimlarining jangovar shaylik asosida tayyorlangan chiqishlari mahalla ahlining ona vatanga bo‘lgan muhabbatini yanada oshirishga xizmat qilib, ular qalbida shu vatanda yashayotganligidan faxr va iftixor tuyg‘ulari jo‘sh urdi.

Endilikda Bog‘i eramliklar ham ko‘chalari ravon, kommunal xizmatlari barqaror bo‘lgan, yangilangan mahallada hayot kechirishadi.