Joriy yilning 12 yanvar sanasida o‘tkazilgan Xavfsizlik kengashining kengaytirilgan yig‘ilishida davlatimiz rahbari tomonidan mutasaddilarga yoshlarni Vatanparvarlik ruhida tarbiyalash, ularda boy ma’naviy meros qadim urf-odat va an’analarimizni singdirish,  aniq maqsadiga ega aqlan va jismonan komil shaxsni shakllantirishga yo‘naltirilgan  qator vazifalar belgilab berilgan edi.

Ana shu topshiriqlarni vohamizning Muzrabot tumanida amalga oshirilishiga mas’ul Surxondaryo viloyati 3-sektori rahbari viloyat Ichki ishlar boshqarmasi boshlig‘i polkovnik Ismailov Timur Kamalatdinovich tashabbusi bilan hududda bir-birini to‘ldirayotgan manzilli tadbirlar tashkil etilmoqda.  Tumanning Yurtim Jamoli mahallasida tashkil etilgan tadbirlar  avvalida uyushmagan yoshlar tomonidan O‘zbekiston Respublikasi davlat madhiyasi kuylandi. Shundan so‘ng oilalarda sog‘lom turmush tarzini targ‘ib etishga yo‘naltirilgan “Salomatlik uchun besh ming qadam” aksiyasi o‘tkazildi. Unda 500 dan ziyod mahalla fuqarolari piyoda yurish marafonida ishtirok etishdi. Harbiy orkestr jo‘rligida Jangovar bayroqning  tantanali olib chiqish jarayoni kishida beixtiyor g‘urur va iftixor tuyg‘ularni baxsh etadi. Vatanparvarlik ruhidagi musiqalar askarlarning jangavorligini oshiradigan  qo‘shiqlari yoshlarni Yangi O‘zbekiston armiyasi saflarida harbiy xizmatni o‘tashga bo‘lgan ishtiyoqini oshirdi. Harbiy xizmatchilarning jangovor chiqishlarini  tomoshabinlar  har doim faxr va hayajon bilan kuzatishadi. Surxondaryo  viloyat IIB Alohida vazifalarni bajaruvchi safarbarlik otryadi xodimlari ham jangovor tayyorgarliklari va maxsus vositalar, qurollar ko‘rgazmasi bilan muzrabotlik yoshlarga  g‘ururlanish hissini in’om etishdi.

Yoshlar jam bo‘lgan davrada sport musobaqalariga ham keng o‘rin berildi. Ular sportning shaxmat-shashka, arimresling, arqon tortish, kamondan o‘q uzish, tosh ko‘tarish musoboqalarida o‘z imkoniyatlarini sinovdan o‘tkazishdi.

3-sektor kubogi uchun o‘tkazilgan futbol bellashuvlarida tumandagi 14 ta mahallaning futbol jamoa vakillari  birin-ketin  g‘oliblik uchun maydonga tushishdi. Murosasiz bahslar natijasiga ko‘ra birinchi, ikkinchi, uchinchi o‘rinlarni egallagan “Yurtim Jamoli”, “At-Termiziy ”,  “Oriyat” mahallasi yoshlari  sektor rahbarining qimmatbaho sovg‘alari bilan rag‘batlantirildi. “Yurtim Jamoli” mahallasi yoshlariga esa ko‘chma kubok topshirildi.

Sport bellashuvlari ko‘chat ekishdek hayrli tashabbuslarga ulanib ketdi. “Yashil makon” umummilliy loyihasi doirasida 300 dan ortiq mevali va manzarali ko‘chatlar o‘tqazildi.  Hasharchi va  musoboqa ishtirokchilari uchun yozilgan fayzli dasturxonga osh ham tortildi.

Kechga borib   doshqozonda sumalak qaynatildi. Katta gulxan yoqildi, uning atrofida san’at va adabiyotga ixlosmand  mahalla yoshlari jam bo‘lishib o‘z iqtidorlarini  namoyon etishdi. Gulxan atrofidagi oqshomda gitara sadosi ostida qo‘shiqlar kuylandi baxshilar jo‘rligida  maroqli madaniy xordiq olindi.