Uchrashuvda, tuman IIB boshlig‘i, ta’lim muassasa rahbarlari, idora va tashkilotlar, Yoshlar ittifoqi, mahalla yettiligi ishtirok etishdi.

Dastavval, tuman kasb-hunar maktabi faoliyati bilan o‘rganishlar olib borildi.

Kasb-hunar maktabida hozirgi kunda 5 ta (Chilangarlik, Tikuvchilik, Payvandlash, avtomobillarni ta’mirlash, traktorchi-mashinist) yo‘nalish bo‘yicha 357 nafar o‘quvchilar tahsil olib kelmoqda. Maktabda 23 nafar tajribali o‘qituvchi va ishlab chiqarish ta’limi ustalari tomonidan zamonaviy texnologiyalar asosida puxta bilim va kasb sirlari o‘rgatilib kelinmoqda.

Shundan so‘ng, qizil toifadagi yoshlarning muammolari o‘rganilib, murojaatlari qabul qilindi.

Uchrashuv davomida, yoshlar tomonidan uy-joy olish uchun subsidiya ajratish, tadbirkorlik faoliyatlarini yo‘lga qo‘yish va kengaytirish uchun kredit mablag‘lari olish, ishga joylashish, tikuvchilik bilan shug‘ullanishlari uchun tikuv mashinkasi, o‘t o‘rish apparati, yog‘och kesish apparati, probatsiya nazoratidan muddatidan ilgari ozod qilish va boshqa masalalar yuzasidan murojaatlari tinglanib, ularga ijobiy yechim izlandi.

O‘z muammoli masalalariga yechim izlab kelgan 78 nafar yoshlarning 40 ga  yaqin murojaatlari tinglanib, 9 tasi shu joyning o‘zida ijobiy hal etilgan bo‘lsa, 13 nafariga huquqiy tushuntirishlar berildi.

O‘rganish uchun muddat talab etilgan 18 ta murojaatlarning ijrosi boshqarma boshlig‘i tomonidan nazoratga olingan bo‘lsa 18 ta murojaat mazmunan ko‘rib chiqilish uchun tegishli tashkilot va idoralarga yuborildi.

Shuningdek, uchrashuv davomida, ishsiz bo‘lgan yoshlardan 1 nafariga yog‘och kesish apparati, 3 nafariga o‘t o‘rish apparati, 1 nafariga o‘simliklarga dori sepish apparati va bir nafar nogironligi bor shaxsga nogironlik aravachasi hamda 12 nafar yoshlarga kitoblar to‘plami topshirildi.

Yoshlar bilan o‘tkazilgan ushbu uchrashuvdan ko‘zlangan asosiy maqsad esa kelgusida ushbu toifadagi yoshlarni ma’naviy dunyoqarashini mustahkamlash, ularni bo‘sh vaqtlarini mazmunli tashkil etish orqali bandligini ta’minlash, jinoyat va huquqbuzarlik yo‘liga kirishining oldini olishga qaratilgandir.