Bugun yurtimizning barcha hududlarida bo‘lgani kabi Muzrabot tumanidagi 31-umumta’lim maktabida ham "Yangi hayot uchun, yangi O‘zbekiston uchun!" shiori ostida birinchi qo‘ng‘iroq tadbiri bo‘lib o‘tdi. Unda viloyat IIB boshlig‘i, polkovnik A.Ismoilov ishtirok etdi. So‘zga chiqqan A.Ismoilov ta’lim sohasidagi o‘zgarishlarga to‘xtaldi. Aytish kerakki, oxirgi 6 yil davomida viloyatda 80 taga yaqin maktablar va maxsus fanlarga ixtisoslashgan ta’lim muassasalarining qurilib, foydalanishga topshirilishi natijasida o‘quvchilar sig‘imi 38 mingdan 52 mingdan ortiq sig‘imga aylantirildi.

Bundan tashqari, pedagog xodimlarning 34 ming nafardan 45,7 ming nafarga yetkazilishi, maktab kutubxonalari sonining 102 taga ko‘patirilishi, undagi kitoblar sonini 577 ming taga oshirilishi, 918 ta maktablarning to‘liq kompyuter jamlanmasi bilan ta’minlanishi, 633 ta maktablarda sport zallarini qayta rekonstruksiya yoki yangidan qurilishi kabi bir qancha imkoniyat va sharoitlar davlatimiz rahbari tomonidan ilmga chanqoq o‘quvchi-yoshlar uchun yaratib berilmoqda.

Misol uchun, 2023 yilda maktab ta’limi tizimidagi jami 130 ta umumta’lim maktablarida qurilish-tiklash ishlari amalga oshirilmoqda.

Maktablarni o‘quv yiliga tayyorlash uchun jami

306,3 mlrd. so‘m mablag‘ ajratilgan.

Shu kunga qadar bulardan, investitsiya dasturi asosida 35 ta maktab, ya’ni, 2 ta yangi qurilgan, 33 ta rekonstruksiya qilingan maktablar foydalanishga topshirildi.

Shuningdek, 37 ta umumta’lim maktablar laboratoriya jihozlari, 110 ta maktab zamonaviy kompyuter texnikalari, 158 ta maktab 1 ming 19 kvt quvvatli  quyosh elektr panellari bilan ta’minlandi.

Hozirda tashabbusli budjet asosida 95,9 mlrd. so‘m mablag‘ evaziga 95 ta maktablarda qurilish ta’mirlash hamda moddiy-texnik bazasini yaxshilash ishlari olib borilmoqda.

Ayni vaqtda viloyatda 948 ta maktablarda 2022-2023 o‘quv yilida 1-sinfga 60 mingga yaqin o‘quvchilar qabul qilinishi evaziga maktablarda 525 mingga yaqin o‘quvchilar ta’lim olmoqda.

O‘quvchilarga yaratib berilgan shart-sharoitlar, yoshlarni nafaqat tuman yoki viloyat balki, respublika miqyosidagi turli ko‘rik-tanlovlar, sport musobaqalari, intelektual o‘yinlar, bellashuvlar kabi tanlovlarda ishtirok etib, yuqori natijalarga erishganligi kelgusidagi rejalarimiz va maqsadlarimizni bardavom qo‘yishga zamin yaratadi.

Jumladan, sport sohasida viloyatdagi umumta’lim maktablarida tahsil oluvchi o‘quvchi-yoshlar tomonidan joriy yilda Jahon, Osiyo, Xalqaro, O‘zbekiston chempionati va kuboklarida 59 ta oltin, 57 ta kumush, 122 ta bronza medallar qo‘lga kiritildi.

Bundan tashqari, joriy yilda asosiy fan olimpiadaning Respublika bosqichida viloyatimizdan 4 nafar o‘quvchilarimiz g‘oliblikni qo‘lga kiritib, shundan 2 nafari 1-o‘rin, 1 nafari 2-o‘rin, 1 nafari 3-o‘rinni egalladi.

G‘oliblarning ustozlari tegishlicha bir martalik pul mukofotlari bilan mukofotlandi. Bu yutuqlar albatta aziz ustozlarimizning mashaqqatli mehnatlari va izlanishlarining samarasidir.

Eng quvonarli jihati, 274 nafar 11-sinf o‘quvchilarimiz muddatida oldin oliy ta’lim muassasalariga kirish imkoniyatini qo‘lga kiritishdi. Ushbu natijalardan ko‘rinib turibdiki, yurtimizda barcha sohalarda bo‘lgani kabi xalq ta’limi tizimida ham islohotlar davom etayapti.

Bularning barchasi, avvalo yurtimiz tinchligining samarasi bo‘lsa, ikkinchidan o‘g‘il-qizlarimizning hech kimdan kam bo‘lmay barkamol bo‘lib ulg‘ayishi yo‘lida qilinayotgan sa’y-harakatlar namunasidir.

Shular haqida so‘zlar ekan 31-maktab o‘quvchilarining yutuqlarini ham sanab o‘tdi. Ushbu ta’lim muassasasida, 2022-2023 o‘quv yilida, 24 nafar o‘quvchilar maktabning 11-sinfini tamomlab ularning 9 nafari oliy ta’lim muassasalariga o‘qishga kirdi. Joriy yilni bitiruvchilaridan 1 nafari muddatidan oldin talabalikka qabul qilindi, fan olimpiadalarida faol qatnashib, 4 nafari tuman bosqichida faxrli 1,2,3 o‘rinlarni qo‘lga kiritib, viloyat bosqichiga faol ishtirok etgani alohida ta’kidlandi.

Tadbirda A.Ismoilov barcha o‘quvchi va ustozlarni Mustaqilligimizning 32 yilligi bayrami bilan tabriklab, yangi o‘quv yilini yangi shijoat bilan boshlashlari uchun samimiy tilak birdirdi.

Shundan so‘ng, birinchi qo‘ng‘iroq chalinib, mustaqillik darslari boshlandi. Viloyat IIB boshlig‘i A.Ismoilov tomonidan ham bitiruvchi sinf o‘quvchilariga mustaqillik darsi o‘tib berildi. Unda mustaqillik yillarida amalga oshirilgan islohotlar, kecha va bugungi hayotimizdagi o‘zgarishlar haqida hayotiy misollar haqida so‘z bordi.