Bugun ichki ishlar organlari tizimida ham har bir xodim uchun sport bilan shug‘ullanish – kunlik hayot tarziga aylanmoqda. Buning natijasi o‘laroq, kurash, sambo, dzyudo, boks, futbol kabi sport turlari bilan professional darajada shug‘ullanayotgan xodimlarimiz soni ko‘paymoqda.

Joriy yilning 5-9 noyabr kunlari Surxondaryo viloyatida bo‘lib o‘tgan Ichki ishlar vazirligi tarkibiy va hududiy bo‘linmalari terma jamoalari  o‘rtasida sportning milliy kurash, yunon-rum hamda erkin kurash turlari bo‘yicha “Ichki ishlar vaziri kubogi” musobaqasi tom ma’noda ushbu ezgu tashabbusning uzviy davomchisi bo‘ldi.

Termiz shahridagi “Surxon sport majmuasi”da o‘tkazilgan musobaqaning respublika bosqichida polvonlar halol bel olishdi.

Natijalarga ko‘ra, sportning milliy kurash turi bo‘yicha 3- o‘rin Buxoro va Navoiy viloyati, 2-o‘rin Surxondaryo viloyati IIB jamoasiga nasib qilgan bo‘lsa, faxrli 1-o‘rinni Qashqadaryo viloyati jamoasi qo‘lga kiritishdi.   

Sportning yunon-rum turi bo‘yicha esa 3-o‘rinni Jizzax va Sirdaryo viloyatlari, 2-o‘rinni Qoraqalpog‘iston Respublikasi, 1-o‘rinni IIV JIED (Jazoni ijro etish Departamenti) jamoasi qo‘lga kiritishdi.

Sportning erkin kurash turi bo‘yicha 3-o‘ringa Surxondaryo va Navoiy viloyatlariga, 2-o‘rin Qoraqalpog‘iston Respublikasiga, 1-o‘rin IIV JIED (Jazoni ijro etish Departamenti) jamoasi munosib ko‘rildi.

Umumjamoa hisobida 1-o‘rin Qashqadaryo viloyati, 2-o‘rin Surxondaryo viloyati hamda 3-o‘rin Buxoro viloyatiga nasib qildi.

Nominatsiyalar bo‘yicha:

“Eng yaxshi texnika ustasi” nominatsiyasi bo‘yicha – Surxondaryo viloyati IIB TVBSO (Tezkor vazifalarni bajaruvchi safarbarlik otryadi) katta mutaxassisi katta serjant Jandrev Shermuxammad Mamarajab o‘g‘li;

“G‘alabaga bo‘lgan intilishi” nominatsiyasi bo‘yicha – Surxondaryo viloyati IIB TVBSO (Tezkor vazifalarni bajaruvchi safarbarlik otryadi) katta mutaxassisi katta serjant To‘xtashev Sanjar Karomatovichlar munosib deb topildi.

Musobaqa yakunida g‘oliblikni qo‘lga kiritgan sportchilar va jamoalarga Ichki ishlar vazirligining qimmatboho esdalik sovg‘alari tashkilotchi mas’ullar tomonidan tantanali ravishda topshirildi.