O‘zbekiston Respublikasi Vazirlar Mahkamasining 2020 yil 14 dekabr kunidagi “2020-2025 yillarda kitobxonlik madaniyatini rivojlantirish va qo‘llab-quvvatlash milliy dasturini tasdiqlash to‘g‘risida”gi 781-son Qarori hamda Ichki ishlar vazirligining 2024 yil 19 aprel kunidagi tegishli farymoyishiga asosan “O‘zbekiston-2030” strategiyasini amalga oshirish doirasida Ichki ishlar organlarida xizmat qilayotgan yosh xodimlarning kitobxonlik madaniyatini rivojlantirish, tizimda faol kitobxonlar safini kengaytirish maqsadida joriy yilning 22-27 aprel kunlari “Kitobxonlik haftaligi” deb e’lon qilindi.

Shu munosabat bilan, Surxondaryo viloyati ichki ishlar boshqarmasi Ma’naviy-ma’rifiy ishlar va kadrlar bilan ta’minlash xizmati xodimlari tomonidan, viloyat ichki ishlar boshqarmasi xodimlari uchun o‘zbek va jahon adabiyotining eng sara durdona asarlaridan iborat “Kitob yarmarkasi” tashkil etildi.

Shundan so‘ng, Ichki ishlar organlari tizimida xizmat olib borayotgan xodim va xodimalar bilan birgalikda Termiz shahrida joylashgan “Adib Sobir Termiziy” nomidagi markaziy axborot resurslar markazi (kutubxona)ga tashrif buyurishdi. Bundan ko‘zlangan asosiy maqsad ichki ishlar organlari xodimlari o‘rtasida kitobxonlik madaniyatini rivojlantirish, ularni kitob o‘qishga bo‘lgan qiziqishlarini yanada oshirishdan iborat. Tashrif davomida xodimlarga kutubxona mas’ul xodimlari tomonidan kutubxona to‘g‘risida batafsil ma’lumotlar berildi.

Shundan so‘ng ilmga chanqoq viloyat ichki ishlar organlari yosh xodimlari mazkur kutubxonada mavjud adabiyotlar bilan tanishish imkoniyatiga ega bo‘libgina qolmay kutubxonaning doimiy kitobxoniga ham aylanishdi. Viloyat ichki ishlar organlarining yosh xodimlari shu yerning o‘zida kutubxonaga a’zo bo‘lishib, uch yil davomida ushbu dargohga kelib, o‘zlarini qiziqtirgan adabiyotlarini olib o‘qish imkoniyatiga ega bo‘ldilar. Bu kabi tadbirlar tizimda xizmat qilib kelayotgan xodimlarda ulkan taassurotlar uyg‘otibgina qolmasdan, ularning kelgusidagi xizmat faoliyatida yuksak ma’naviyatli kadr bo‘lib yetishishida ham muhim ahamiyat kasb etadi.

Bu kabi kitobxonlik tadbirlari viloyatning barcha shahar-tuman ichki ishlar bo‘limlarida uyushqoqlik bilan tashkil etib kelinmoqda.