Xabaringiz bor O‘zbekiston Respublikasi Prezidentining 2023-yil 7-ferval kunidagi “O‘zbekiston Respublikasi Inson huquqlari sohasidagi Milliy ta’lim dasturini tasdiqlash to‘g‘risida”gi PQ-46-son qaroriga muvofiq, Surxondaryo viloyati Ichki ishlar organlarining tezkor-qidiruv, tergovga qadar tekshiruv, surishtiruv, dastlabki tergov faoliyatini amalga oshiruvchi, jazoni ijro etish muassasasi hamda viloyat prokuraturasining xodimlari bilan “Qiynoqqa solishga qarshi kurash: xalqaro amaliyot va milliy tajriba” mavzusida ikki kunlik sayyor o‘quv yig‘inlari tashkil etildi.

Tashkil etilgan o‘quv yig‘inidan ko‘zlangan asosiy maqsad, xodimlarga “Inson huquqlari sohasidagi xalqaro standartlar”, “Qiynoq hamda muomala va jazolashning qattiq shafqatsiz, insoniylikka zid yoki qadr-qimmatni kamsituvchi turlariga qarshi konvensiyaning mazmun-mohiyati”, “Qiynoqqa solish bilan bog‘liq qilmishlar sodir etilishini oldini olishga oid qonunchilikning rivojlanishi”, “Qiynoqqa solish uchun javobgarlik masalalari”, “O‘zbekistonda jazoni ijro etish tizimini isloh qilish jarayonlari va mahkumlar huquqlari”, “Ushlab turish, qamoqqa olishga oid xalqaro standartlar, mahbuslar huquqlarini ta’minlash kafolatlari”, “Nelson Mandella qoidalarining mazmun-mohiyati” hamda “Yangilangan Nelson Mandella qoidalari”ning mazmun-mohiyatini yetkazishdir.  

O‘quv yig‘inini viloyat IIB boshlig‘i o‘rinbosari podpolkovnik Sh.F.Shadiev kirish so‘zi bilan ochib, tadbir qatnashchilariga taklif qilingan professor-o‘qituvchi va mutasaddi xodimlarni tanishtirdi va mazkur sayyor o‘quv yig‘ini muhtaram Prezidentimizning qarorlari asosida tashkil etilganligini ma’lum qildi.

Shundan so‘ng, o‘quv yig‘iniga tashrif buyurgan mutasaddilar so‘z olishdi.

O‘quv yig‘ini ochilishida O‘zbekiston Respublikasi Oliy Majlisi Qonunchilik palatasi Spikerining birinchi o‘rinbosari, Inson huquqlari bo‘yicha O‘zbekiston Respublikasi Milliy markazi direktori Akmal Saidov va O‘zbekiston Respublikasi Bosh prokurori Nig‘matulla Yo‘ldoshevning “online” murojaatlari tinglandi.

Mazkur o‘quv yig‘inida, xodimlarga Inson huquqlari bo‘yicha O‘zbekiston Respublikasi Milliy markazi, O‘zbekiston Respublikasi Huquqni muhofoza qilish akademiyasi, O‘zbekiston Respublikasi Fanlar akademiyasi davlat va huquq instituti, IIV Akademiyasi hamda IIV Malaka oshirish instituti professor-o‘qituvchilari va mutassadi xodimlari tomonidan o‘quv mashg‘ulotlari o‘tkazildi.

O‘quv yig‘ini ishtirokchilari o‘zlarining qiziqtirgan savollariga javoblar olishdi.

Tashkil etilgan ikki kunlik o‘quv yig‘ini yakunida, sayyor o‘quv yig‘inida faol ishtirok etgan hamda sinovlarni muvaffaqiyatli topshirgan xodimlarga Inson huquqlari bo‘yicha O‘zbekiston Respublikasi Milliy markazi tomonidan belgilangan namunadagi sertifikatlar tantanali ravishda topshirildi.