IIV ma’naviy-ma’rifiy ishlar va kadrlar bilan ta’minlash departamentining 2024 yil 23. Yanvar kunidagi tegishli ko‘rsatmasi ijrosini ta’minlash uchun Ilm-fan va ta’lim o‘rtasidagi integratsiyani rivojlantirish, ijtimoiy-gumanitar yo‘nalishlarida amalga oshirilayotgan ilmiy ishlar, qo‘lga kiritilgan fan yangiliklarini talabalarga yetkazish, ularni tarix, adabiyot va madaniy merosimiz bo‘lmish qo‘lyozmalarni tadqiq etishga qiziqtirish hamda yoshlarda vatanparvarlik ruhini mustahkamlash, shuningdek o‘qituvchi kadrlarning salohiyatini oshirish maqsadida, IIV Surxondaryo akademik litseyida “Manbashunoslik va tarixiy tadqiqot natijalarini ta’limga joriy etish masalalari” mavzusida ilmiy-amaliy seminar tashkil etildi.

Tadbir 2 qismdan iborat bo‘lib, juda yuqori saviyada o‘tkazildi. Seminarning 1-qismi akademik litsey talabalari bilan muloqot tarzida bo‘lib, O‘zbekiston Respublikasi Fanlar akademiyasi Tarix instituti yetakchi ilmiy xodimasi tarix fanlari doktori Nigora Allaeva, Abu Rayxon Beruniy nomidagi Sharqshunoslik instituti “Sharq mumtoz adabiyoti bo‘limi” mudiri filologiya fanlari nomzodi Salimaxon Eshonova, Guliston Davlat universiteti dotsenti tarix fanlari nomzodi Dilorom Sangirova va Termiz davlat universiteti “Turizm kafedrasi” dotsenti, iqtisod fanlari bo‘yicha falsafa doktori (PhD) Gulshan Abdulxaevalar talabalarni o‘qib bilim olishda shijoat bilan olg‘a intilishga chorlashdi.

Olimalar tomonidan talabalarga birlamchi manbalarni bilish, fanlarni o‘rganishda qo‘shimcha adabiyotlarni o‘zlashtirish ahamiyatining tushuntirilishi hamda yurtni sevish o‘z sohasining yetuk mutaxassisi bo‘lib yetishish orqali ifodalanishining uqtirilishi yoshlarda katta taassurot uyg‘otdi.

Tadbirning 2-qismi litsey o‘qituvchilariga mahorat darsi va davra suhbati shaklida tashkil etilib, unda raqobatbardosh kadrning zamonaviy mezonlari, yo‘llari va yangi texnologiyalardan foydalanishning muhim vositalari haqida amaliy maslahatlar berildi. Talabalarda tarixiy mushohada qilish ko‘nikmasini rivojlantirishning muhimligi alohida ta’kidlandi. 

Tadbir so‘nggida Akademik litsey 2-bosqich o‘quvchisi Ichki ishlar vaziri stipendiyasi sohibasi D.Omonova tarix fanidan 100 foizlik natija bilan umumta’lim fanini bilish darajasi to‘g‘risidagi sertifikatni qo‘lga kiritganligi hamda 2-imtiyozli sertifikatga ega bo‘lganligi munosabati bilan taqdirlandi. Dilchehra Omonovaga taqdim etilgan sertifikatining tarixchi olima Nigora Allaeva tomonidan topshirilishi esa yosh talaba qizga ilm olish va izlanishiga yanada undaydi.

Tashkil etilgan ilmiy-amaliy seminar talabalar hamda o‘qituvchilar uchun juda qiziqarli va ahamiyatli bo‘ldi.