Joriy yilning 15 iyun kuni O‘zbekiston Respublikasi  Ichki  ishlar vazirligi Surxondaryo akademik litseyida ta’lim va tarbiya olib, o‘zida ichki ishlar organlari xodimlari uchun zarur bo‘lgan dastlabki kasbiy bilim, yuksak vatanparvarlik va ma’naviy-axloqiy fazilatlarni shakllantirgan, kelgusida Vatanimiz ravnaqi, yurt tinchligi osoyishtaligiga o‘zining, chinakkam hissasini qo‘shadigan 156 nafar o‘quvchi yoshlarning bitiruv tadbiri bo‘lib o‘tdi.

Ushbu tadbirda Surxondaryo viloyati IIB boshlig‘i polkovnik Timur Ismailov, viloyat IIB boshlig‘i o‘rinbosarlari, viloyat IIB Faxriylar kengashi a’zolari, tuman hokimligi va Ichki ishlar bo‘limi mas’ullari, bitiruvchi yoshlarning ota-onalari ishtirok etishdi.

Tantanali tadbirda so‘z olgan viloyat IIB boshlig‘i ta’lim dargohini bitirayotgan o‘quvchi yoshlarning olgan bilimlari orqasidan erishgan yutuqlari haqida so‘z yuritib, ularning kelgusidagi ishlariga omadlar tiladi.

Shundan so‘ng tadbirning asosiy qismi bitiruvchi o‘quvchilarga diplomlarni topshirish marosimi bo‘lib o‘tdi.

Tantanali diplom topshirish marosimida viloyat IIB boshlig‘i va boshqarma boshlig‘i o‘rinbosarlari, Faxriylar kengashi rahbarlari va a’zolari qo‘lidan diplomlarni olish jarayonida har bir o‘quvchi o‘g‘il-qiz g‘urur va iftohor bilan “O‘zbekiston Respublikasiga sadoqat bilan xizmat qilaman!”- deya, Ona vataniga o‘z sadoqatini namoyon etishdi.

Tantanali tadbir davomida, so‘z olganlar ushbu ta’lim dargohi va bitiruvchi o‘quvchilari haqida o‘zlarining iliq fikrlarini bildirishdi.

Tadbir so‘ngida, IIV Surxondaryo Akademik litsey o‘quvchi o‘g‘il-qizlari tantanavor yurishga saf tortishib, rahbarlar oldidan o‘zgacha hayajon, o‘zgacha quvonch va viqor bilan safdan o‘tishdi.