O‘zbekiston Respublikasi IIVning “Ichki ishlar vazirligi Akademiyasi kursant va tinglovchilarining ichki ishlar organlarida amaliyotlarini tashkil etish to‘g‘risida”gi hamda viloyat Ichki ishlar boshqarmasi boshlig‘ining tegishli buyruqlari ijrosini ta’minlash maqsadida, Surxondaryo viloyati IIB majlislar zalida IIV Akademiyasining kunduzgi ta’lim 2-o‘quv kursi kursantlari ish o‘rganish amaliyoti bo‘yicha yakuniy sinov imtihonlari hamda “Uch avlod” uchrashuvi tashkil etildi.

Mazkur uchrashuvda, boshqarma boshlig‘i o‘rinbosari podpolkovnik Shadiev Sherzod Fayzullaevich so‘zga chiqib, jonajon O‘zbekistonimizda hukm surayotgan tinchlik-osoyishtalik, millatlararo totuvlik, bag‘rikenglik muhitini ko‘z qorachig‘idek asrab-avaylash, bunday bebaho boylikni muttasil mazmunan boyitib borish, O‘zbekiston taraqqiyoti yo‘lida bir mushtga jipslashib, davlatimiz rahbariga tayanch va suyanch bo‘lib xizmat qilish, kelgusi avlodlarni shu ruhda kamol toptirish muqaddas burch ekanligini ta’kidlab o‘tdi.

Shundan so‘ng, IIV Akademiyasi Jinoyat-protsessual huquq kafedrasi dotsenti podpolkovnik Turdiev Laziz Zaripovich so‘zga chiqib, yig‘ilganlarga vazirlik akademiyasi, mutaxassislik yo‘nalishlari va bugungi kunda Akademiyada yaratilayotgan shar-sharoitlar haqida tushunchalar berib o‘tdi.

Uchrashuv davomida, viloyat IIB faxriylar kengashi a’zolari so‘zga chiqishib, o‘zlarining hayot yo‘llari va mehnat faoliyatlari davomida to‘plagan boy tajribalari, xizmat davridagi o‘ziga xos qiyinchiliklar va mashaqqatlar haqida so‘zlashib, bugungi kunda hukumatimiz tomonidan nuroniylar qolaversa ichki ishlar organlari xodimlari uchun yaratilayotgan shar-sharoitlardan oqilona foydalanish kerakligi, el-yurt ravnaqi yo‘lida mamlakatimiz rahbariga yaqin ko‘makchi, kamarbasta bo‘lish lozimligi haqida so‘zlashib, faxriy ustozlar tizimida xizmat olib borayotgan yosh xodimlar uchun doimiy ravishda mas’ul ekanliklarini ta’kidlab o‘tdilar.

Shuningdek, uchrashuv davomida yakuniy sinov imtihonlarida kursantlar tomonidan amalga oshirgan ishlar, yo‘l qo‘yilgan kamchiliklar muhokamasi ham o‘tkazildi.

Tadbir so‘ngida, viloyat ichki ishlar organlarida o‘tkazgan ish o‘rganish amaliyoti davomida berilgan vazifalarni namunali darajada bajarganligi, o‘zini ijobiy tomondan namoyon etib, ustoz-murabbiylarning ishonchiga sazovor bo‘lib, amaliyot rahbari tomonidan o‘ziga yuklatilgan xizmat vazifalarini o‘z vaqtida hamda vijdonan bajarib, namunali hulq-atvori bilan boshqa kursdoshlariga o‘rnak bo‘lib kelayotgan aurim kursantlar viloyat ichki ishlar boshqarmasi boshlig‘ining tashakkurnomasi bilan taqdirlandi.