Ichki ishlar vaziri o‘rinbosari general-mayor Mirzarahimov Bahodir Yuldashevich boshchiligidagi ishchi guruh Surxondaryo viloyatida o‘z ishini boshladi. Dastlab, vazir o‘rinbosari viloyat IIB Xavfsiz turizmni ta’minlash boshqarmasi xizmat binosiga tashrif buyurdi. U yerdagi xodimlarning xizmat faoliyati, xizmat xonalari, yaratilgan shart-sharoitlarni ko‘zdan kechirar ekan situatsion markaz faoliyati bilan ham yaqindan tanishdi.

Shundan so‘ng, general-mayor B.Mirzarahimov viloyat IIB sport kompleksida bo‘ldi. Majmuadagi xodimlarning bo‘sh vaqtlarida sport bilan shug‘ullanishlari uchun yaratilgan sharoitlar, jangovar tayyorgarlikni oshirish, mashg‘ulotlar olib borish uchun mavjud inventarlarni ko‘zdan kechirdi.

Keyingi manzil Termiz tumanidagi turizm namoyish ob’ektlaridan biri bo‘lgan Al-Hakim at-Termiziy ziyoratgohi bo‘ldi. U yerda vazir o‘rinbosari dastlab, buyuk muhaddis olimning maqbarasini ziyorat qildi va Qur’on tilovat qilindi. Shundan so‘ng, ziyoratgohdagi holat, u yerda mahalliy va xorijlik sayyohlar uchun qanday qulayliklar mavjudligi bilan tanishdi. Turistlar oqimini ko‘paytirish uchun tegishli tavsiyalarini berib o‘tdi.

Sherobod tumanida joylashgan Abu Iso at-Termiziy ziyoratgohi ham bugungi kunda sayyohlarning gavjum maskanlaridan biriga aylangan. General-mayor B.Mirzarahimov ushbu majmuada ham bo‘ldi va xizmat ko‘rsatish sifati, turistlarning xavfsizligini ta’minlash bo‘yicha e’tibor qilinishi lozim bo‘lgan jihatlar yuzasidan mas’ullarga topshiriqlar berdi.

O‘rganish ishlari davom etmoqda