Ichki ishlar vaziri o‘rinbosari B.Mirzarahimovning bu galgi o‘rganish ishlari Termiz shahridagi “Temiryo‘lchilar” madaniyat saroyida Transportda xavfsizlikni ta’minlash boshqarmasi hamda Termiz mintaqaviy temir yo‘l uzeli xodimlari bilan uchrashuvdan boshlandi. Yig‘ilishda temir yo‘l sohasida sodir etilayotgan jinoyat va huquqbuzarliklarni oldini olishda o‘zaro hamkorlikni tashkil etish borasida so‘z yuritildi.

Shuningdek, xizmat faoliyati davomida ijobiy ko‘rsatkichlarga erishganligi uchun Transportda XTB va Temir yo‘l tizimining ayrim xodimlari faxriy yorliq va esdalik sovg‘alari bilan taqdirlandi.

Shundan so‘ng, o‘rganish ishlari Jarqo‘rg‘on tumanida davom etdi. Asosan, tuman Ichki ishlar bo‘limining faoliyati, tumandagi jinoyatchilik ahvoli va mahallalarda jinoyatchilikni oldini olish ishlariga e’tibor qaratildi.

Dastlab tumandagi 4 ta sektor rahbarlari bilan uchrashib, ular bilan hududda jinoyat va huquqbuzarliklarning oldini olish, aholi muammolari va ijtimoiy-iqtisodiy sektorda amalga oshirilayotgan ishlar borasida suhbatlashdi.

Tumandagi "Do‘stlik" mahallasi “qizil” toifadagi hudud sanaladi. Tashrif davomida mazkur mahalla hududida jinoyat va xuquqbuzarliklarni barvaqt oldini olish borasida amalga oshirilayotgan chora-tadbirlar hamda zamonaviy axborot-kommunikatsiya vositalarining tadbiq etilganligi ko‘zdan kechirildi. Mahalladagi beshlik bilan suhbatlashish jarayonida jinoyatchilikni oldini olishda hamkorlikda ish olib borishlari aytib o‘tildi.

Vazir o‘rinbosari Qumqo‘rg‘on tumanidagi qishloq xo‘jaligi mahsulotlarini qayta ishlash imkoniyatiga ega “Agro presscing group” korxonasiga faoliyati bilan ham tanishdi. Xususan, korxonadagi ishchilarning aksariyat qismi yoshlardan iborat ekanligiga ijobiy baho berdi.

Tashrif davomida, tumandagi “qizil” toifadagi “Besh qaxramon” mahallasi faoliyati ham e’tibordan chetda qolmadi. Ushbu mahalla hududida profilaktika inspektori tomonidan jinoyat va huquqbuzarliklarning barvaqt oldini olish borasida amalga oshirilayotgan chora-tadbirlar bilan tanishib, mahalla binosi va profilaktika inspektorlarining xizmat xonalarini tekshirish davomida tozalik va obodonlashtirish ishlarini ko‘zdan kechirdi. Shuningdek, mahalla profilaktika inspektorining xizmat uyiga tashrif buyurib, u yerda yaratilgan shart-sharoitlar bilan tanishdi.

Surxondaryo viloyati IIB Axborot xizmati