Ichki ishlar vaziri o‘rinbosari, general-mayor Bahodir Mirzarahimov boshchiligidagi ishchi guruh vakillari Surxondaryo viloyati hududidagi o‘rganishlarini IIVga qarashli Termiz tumanida joylashgan Xalqaro aeroportlarda xavfsizlikni ta’minlash bo‘yicha alohida batalonida bo‘lishdi. U yerda harbiy qism xizmatchilari bilan o‘tkazilgan uchrashuvda 2022-2023 yillar davomida harbiy xizmatchilarning erishgan yutuqlari va yo‘l qo‘yilgan kamchiliklari tahlil qilindi. Tahlil davomida kamchiliklarni bartaraf etish, harbiy intizomni mustahkamlash bo‘yicha tegishli mas’ullarga topshiriqlar berildi.

Shundan so‘ng, ishchi guruh vakillari harbiy qismdagi shart-sharoitlar, askarlar yotoqxonasi, oshxonasi, harbiy qism kutubxonasi, Vatanparvarlik burchagi bilan tanishishdi. U yerdagi obodonlashtirish ishlarini ko‘zdan kechirishdi.

Navbatdagi manzil Surxondaryo viloyati IIB Xavfsiz turizmni ta’minlash boshqarmasi bo‘ldi. Zamonaviy jihozlangan boshqarma binosi va unda yaratilgan sharoitlar ko‘zdan kechirildi. Moddiy-texnik imkoniyatlari haqida batafsil ma’lumot berildi. Binoda ishga tushirilgan situatsion markaz hamda sayyohlar uchun tashkil etilgan navbatchilik qismi faoliyati o‘rganildi. Jarayonda bugungi kunda vohaga tashrif buyurayotgan xorijlik sayyohlarga sifatli xizmat ko‘rsatish hamda ularning xavfsizligini ta’minlash bo‘yicha qo‘shimcha tavsiyalar berildi.

Bugungi kunda temir yo‘llarda yo‘lovchilarning xavfsizligini ta’minlash, turli ko‘rinishdagi talon-torojlikni oldini olishda viloyat IIB Transportlarda xavfsizlikni ta’minlash boshqarmasi xodimlari tunu kun mehnat qilishmoqda. Mehmonlar ushbu boshqarma xodimlarining ham ish faoliyatini o‘rganishdi. Bugun mazkur yo‘nalishda xodimlar tomonidan amalga oshirilayotgan ishlar, jinoyatchilikni oldini olish borasidagi natijalar bilan tanishishdi. Yo‘l qo‘yilgan kamchiliklar yuzasidan esa tegishli topshiriqlar berildi.

Ichki ishlar vaziri o‘rinbosari boshchiligidagi ishchi guruh tomonidan Surxondaryo viloyatidagi o‘rganish ishlari davom etmoqda.

Surxondaryo viloti IIB Axborot xizmati