“Xavfsiz kiber makon” — har bir fuqaro mas’uliyati!
Bugungi kunda internet hayotimizning ajralmas qismiga aylangan. Biroq u bilan bir qatorda yangi turdagi tahdidlar — kiberjinoyatlar ham ortib bormoqda. Fuqarolarning shaxsiy ma’lumotlarini noqonuniy ravishda o‘zlashtirish, onlayn firibgarlik, fishing orqali aldov yo‘li bilan mablag‘ egallash kabi holatlar kundalik hayotda tez-tez uchramoqda.
Shu bois, jamiyatda kiberxavfsizlik madaniyatini yuksaltirish, aholining internetdan
ongli va xavfsiz foydalanish ko‘nikmasini oshirish maqsadida joriy yil oktabr oyi
davomida mamlakatimiz bo‘ylab “Xavfsiz kiber makon” targ‘ibot oyligi o‘tkazilmoqda.
Shu doirada Surxondaryo viloyati Termiz shahrida ham sohada mas’ul idoralar
hamkorligida aholi o‘rtasida keng qamrovli targ‘ibot tadbiri tashkil etildi. Tadbirda
Termiz shahar prokurori o‘rinbosari Hazratqulov Komil, viloyat IIB Axborot texnologiyalari
sohasidagi jinoyatlarga qarshi kurashish boshqarmasi xodimlari hamda Milliy gvardiyaning
tegishli bo‘linmalari ishtirok etdi.
“Yashil dunyo” markaziy dehqon bozori hududida o‘tkazilgan uchrashuv davomida
savdogarlar va xaridorlarga kiberxavfsizlikning asosiy qoidalari, internet orqali
yuz berishi mumkin bo‘lgan xatarlar haqida tushuntirish berildi. Ayniqsa, onlayn
firibgarlik, fishing, shaxsiy ma’lumotlarni o‘g‘irlash kabi holatlarning oldini
olish bo‘yicha amaliy tavsiyalar yetkazildi.
Fuqarolarga maxsus axborot risolalari va tavsiyanomalar tarqatilib, turli
vaziyatlarda qanday chora ko‘rish, kimlarga murojaat etish kerakligi haqida ham
ma’lumot berildi.
Bunday tadbirlar nafaqat kiberjinoyatlarning oldini olishga, balki fuqarolarda
shaxsiy ma’lumotlarga nisbatan mas’uliyat tuyg‘usini oshirishga xizmat qiladi.
Esda tuting: “Internetdagi har bir bosganingiz iz qoldiradi.” Shaxsiy ma’lumotlaringizni
har kim bilan bo‘lishmang, ishonchsiz havolalarni ochmang va shubhali onlayn operatsiyalarga
aldanmang.
Chunki xavfsiz kiber makon — bu faqatgina davlat idoralarining emas, balki har bir fuqaroning ham mas’uliyatidir!