Sho‘rchi tumanida jinoyatchilik holati og‘ir bo‘lgan ayrim mahallalarda fuqarolar xavfsizligini ta’minlash, huquqbuzarliklarning oldini olish hamda aholini qo‘riqlash xizmati faoliyati bilan yaqindan tanishtirish maqsadida amaliy targ‘ibot ishlari olib borildi.

Qo‘riqlash bo‘limi xodimlari tomonidan tashkil etilgan uchrashuvlar davomida fuqarolarga qo‘riqlash xizmati imkoniyatlari, uy-joy va savdo do‘konlarini qo‘riqlash signalizatsiya vositalariga ulashning afzalliklari haqida atroflicha tushuntirishlar berildi. Shuningdek, jinoyatning oldini olishda “tashvish tugmasi” tizimining ahamiyati haqida ham ma’lumotlar taqdim etildi.

Targ‘ibot doirasida mahallalardagi ko‘p qavatli uylar hamda do‘konlarga “tashvish tugmasi” o‘rnatilib, fuqarolarga uning ishlash tartibi amaliy ko‘rsatib berildi. Ushbu tizim orqali xavfli holat yuz berganda tezkor guruh xodimlari qisqa vaqt ichida hodisa joyiga yetib borishi mumkinligi ta’kidlandi.

Qo‘riqlash xizmati xodimlari aholi bilan muloqot jarayonida har bir fuqaro o‘z mulki va xavfsizligiga nisbatan mas’uliyatli bo‘lishi, huquqbuzarlik holatlariga befarq qaramasligi lozimligini ta’kidlab o‘tishdi.

Bunday amaliy targ‘ibot tadbirlari jinoyatchilikning oldini olish, aholining huquqiy ongi va fuqarolik mas’uliyatini oshirishda muhim ahamiyat kasb etmoqda.