Tarixga nazar solmasdan, kelajakka boqib bo‘lmaydi. Binobarin, insonni inson etib tarbiyalashda eng yaxshi vosita bu “tarix”- deb, bejizga aytilmagan. Ko‘pni ko‘rgan keksa va nuroniylarimiz esa tirik tarixga qiyos qilinadi. Chunki ular ulug‘ yoshni yashab, hayot yo‘lidagi murakkab to‘siqlarni yengib o‘tish sir-sinoatlarini yoshlarga misollar orqali o‘z tarbiyaviy ahamiyatga ega bo‘lgan o‘gitlarini beradilar.

O‘zbekiston Respublikasi Prezidenti tomonidan “9-may Xotira va qadrlash kuni”ni keng nishonlash, II jahon urushida g‘alabaga munosib hissa qo‘shgan barcha mehnat va urush faxriylariga hurmat-ehtirom ko‘rsatish borasida berilgan topshiriqlari hamda O‘zbekiston Respublikasi Ichki ishlar vazirining 2024 yil 29 aprel kunidagi tegishli farmoyishi talablari ijrosini ta’minlash, shuningdek, mustaqillik yillarida xizmat burchini bajarish chog‘ida halok bo‘lgan ichki ishlar organlari xodimlarining xotirasini ulug‘lash, faxriylarni har tomonlama qo‘llab-quvvatlash maqsadida joriy yilning 7 may kuni Surxondaryo viloyati ichki ishlar boshqarmasi tashabbusi bilan Ichki ishlar vazirligi Surxondaryo Akademik litseyida “Jasorat—millat g‘ururi va iftixori” shiori ostida “Uch avlod” uchrashuvi o‘tkazildi.

Uchrashuvda, dastlab viloyat Ichki ishlar boshqarmasi boshlig‘i o‘rinbosari podpolkovnik Sh.Shadiev so‘zga chiqib, jonajon O‘zbekistonimizda hukm surayotgan tinchlik-osoyishtalik, millatlararo totuvlik, bag‘rikenglik muhitini ko‘z qorachig‘idek asrab-avaylash, bunday bebaho boylikni muttasil mazmunan boyitib borish, O‘zbekiston taraqqiyoti yo‘lida bir mushtga jipslashib, davlatimiz rahbariga tayanch va suyanch bo‘lib xizmat qilish, kelgusi avlodlarni shu ruhda kamol toptirish muqaddas burch ekanligini ta’kidlab o‘tdi.

Shundan so‘ng, viloyat IIB Faxriylar kengashi a’zosi iste’fodagi mayor B.Shodiev hamda faxriy ustozlar so‘zga chiqishib, hayoti va mehnat faoliyati davomida to‘plagan boy tajribalari, xizmat davridagi o‘ziga xos qiyinchiliklar va mashaqqatlar haqida so‘z yuritdi.

Bugungi kunda davlatimiz tomonidan nuroniylar qolaversa ichki ishlar organlari xodimlari uchun yaratilayotgan shart-sharoitlardan oqilona foydalanish kerakligi haqida so‘zlashib, faxriy ustozlar tizimda xizmat olib borayotgan yosh xodimlar uchun doimiy ravishda mas’ul ekanliklarini ta’kidlab o‘tishdi.

Uchrashuv davomida, Akademik litsey o‘quvchilari tomonidan bayram tadbiri uchun tayyorlangan she’r, qo‘shiq va badiiy sahna ko‘rinishlari namoyish etilib, tadbirda yig‘ilganlarga o‘zgacha zavq va shavq bag‘ishladi.

Tadbir so‘ngida sana munosabati bilan faxriy ustozlar shuningdek, o‘quv darslari davomida yuqori natijalarga erishib kelayotgan bir guruh o‘quvchilarga boshqarma boshlig‘ining tashakkurnomalari va kitoblar to‘plami topshirildi.

Albatta bu kabi uchrashuvlarni muntazam ravishda o‘tkazib borish, yosh avlodning harbiy-vatanparvarlik tuyg‘usini, ma’naviy dunyoqarashini va intellektual salohiyatini yanada yuksaltirib, yosh avlod ongida Vatan himoyasi har bir fuqaroning sharafli va muqaddas burchi ekanligini, davlat va jamiyat xavfsizligini ta’minlashda mas’uliyat tuyg‘usini yanada oshirishga xizmat qiladi.