Toshkentdan Termizga yuk mashinasida kelgan yo'lovchilar karantinga olindi
Joriy yilning 3 aprel kuni soat taxminan 11-30 lar chamasida Surxondaryo viloyati IIB patrul-post va jamoat tartibini saqlash boshqarmasi patrul-post xizmati xodimi Termiz shahrida yuk avtomobilida o'z manziliga etib olmoqchi bo'lgan 8 nafar surxondaryolik yo'lovchining karantin qoidasini buzganini aniqladi.
"ISUZU" rusumli yuk mashinasi haydovchisi Toshkent shahridan Surxondaryo viloyati markaziga yo'lga tushib, o'z mashinasida sakkiz nafar fuqaroning har birini 50 ming so'm evaziga olib kelgani ma'lum bo'ldi.
Ayni paytda ushbu holat yuzasidan Termiz shahar bo'yicha ichki ishlar organlari faoliyatini muvofiqlashtirish boshqarmasi tomonidan dastlabki surishtiruv ishlari olib borilmoqda.
Shuningdek, sakkiz nafar noqonuniy yo'lovchiga nisbatan ma'muriy bayonnoma tuzilib, ular viloyat ko'p tarmoqli tibbiyot markaziga karantinga olindi.
