“O‘zbekistonda yangi uyg‘onish — Uchinchi Renessans” davrida Yangi O‘zbekistonni barpo etishning ilk kunlaridanoq  Muhtaram Prezidentimiz tomonidan ikkita masala, ya’ni aholi salomatligi va xavfsizligini ta’minlash davlat siyosati darajasiga ko‘tarildi.

Quvonarli tomoni shunda-ki, har bir xodim uchun sport bilan shug‘ullanish – kunlik hayot tarziga aylanmoqda.

Sohada, ayniqsa,  kurash, sambo, dzyudo, boks, futbol, qo‘l jangi kabi sport turlari bilan professional darajada shug‘ullanayotgan xodimlarimiz soni ko‘paymoqda.

O‘zbekiston Respublikasi IIVning 2024 yilning 30 noyabr kunidagi “O‘zbekiston Respublikasi Qurolli Kuchlari va huquqni muhofaza qiluvchi organlar harbiy xizmatchi va xodimlari o‘rtasida sportning kurash turi bo‘yicha “Ichki ishlar vaziri kubogi” musobaqasini o‘tkazish to‘g‘risida”gi tegishli buyrug‘iga asosan joriy yilning 10-11-dekabr kunlari Surxondaryo viloyatining Termiz shahridagi “Alpomish kurash sport majmuasi”da “O‘zbekiston Respublikasi Qurolli Kuchlari va huquqni muhofaza qiluvchi organlari harbiy xizmatchilari hamda xodimlari o‘rtasida sportning kurash turi bo‘yicha “Ichki ishlar vaziri kubogi” musobaqasi bo‘lib o‘tdi.

Musobaqaning taqdirlash marosimida viloyat huquq-tartibot idoralari rahbarlari ham ishtirok etishdi.

Tadbirda viloyat IIB boshlig‘i polkovnik Timur Ismailov so‘zga chiqib, so‘nggi yillarda yurtimizda olib borilayotgan islohotlar, sportga bo‘lgan e’tibor haqida so‘z yuritib musobaqa ishtirokchilariga omadlar tiladi.

Sportning kurash turi bo‘yicha “Ichki ishlar vaziri kubogi” musobaqasida ishtirok etgan sportchilar o‘zlarining kuchlari, chaqqonligi hamda kurash usullaridan foydalangan holda qizg‘in kurashlar olib borishdi.

Unga ko‘ra umum-jamoa hisobida 1-o‘rin Davlat xavfsizligi xizmati terma-jamoasi, 2-o‘rin Ichki ishlar vazirligi terma-jamoasi hamda 3-o‘rin Mudofaa vazirligi terma-jamoasiga nasib etdi.

Musobaqada ishtirok etgan xodimlar va sovrindorlar qimmatbaho hamda esdalik sovg‘alari bilan taqdirlanishdi.