Surxondaryo viloyatida 13-16 noyabr kunlari ichki ishlar organlari kinologiya bo‘linmalari xodimlari o‘rtasida ko‘pkurash musobaqasining respublika bosqichi o‘tkazildi.

Viloyat IIB  TVBSO sport o‘yingohida musobaqaning tantanali ochilish marosimi bo‘lib o‘tdi. 

Shundan so‘ng, bellashuvlarga start berish uchun xizmat itlari veterinariya ko‘rigidan o‘tkazilib, jamoalar a’zolarining qur’a tashlash marosimi o‘tkazildi.

Dastlab, ishtirokchilar xizmat itlari bilan yengil transport vositasida, bino ichida va bagaj yoki qo‘l yuklarda yashirilgan giyohvandlik moddasini qidirib topish mashqi bo‘yicha bellashdilar. Iz-qidiruv yo‘nalishida ham xizmat itlarining iz olish mahorati sinovdan o‘tkazildi. 

Musobaqaning uchinchi kunida ishtirokchilar iz-qidiruvi bo‘yicha buyumni tanlash, kiyim hididan aniqlash, transport yoki qo‘l yuklarida yashirilgan qurol-yaroq yoki portlovchi moddani qidirib topishdagi mahoratini namoyish qilishdi.

Ayniqsa, to‘siqlarni vaqtga yengib o‘tish mashqi anchayin murosasiz kechdi.

Ishtirokchilarning har bir harakati hakamlar hay’ati tomonidan baholab borildi.   

Bellashuvlar nihoyasiga yetgach, 16 noyabr kuni viloyat IIB TVBSO sport o‘yingohida ko‘pkurash o‘yinlarining tantanali yopilish marosimi bo‘lib o‘tdi. Unda viloyatlardan kelgan barcha jamoalar saf tortishdi.

O‘zbekiston Respublikasi IIV JXD JTSX boshlig‘i podpolkovnik O.Sharipov, Surxondaryo viloyati IIB boshlig‘i polkovnik T.Ismailov hamda nafaqadagi polkovnik A.Xoliqovlar so‘zga chiqib kinologiya sohasidagi yangiliklar va bugun yaratilgan sharoitlar to‘g‘risida alohida to‘xtalib o‘tishdi.

Shundan so‘ng, natijalar e’lon qilindi. Unga ko‘ra, umum-jamoa hisobida

3-o‘rin Toshkent shahar IIBB jamoasiga,

2-o‘rin Navoiy viloyati IIB jamoasiga,

1-o‘rin Surxondaryo viloyati IIB jamoasiga nasib qildi.