Davlatimiz rahbarining topshiriqlariga binoan,  fuqarolarning  osoyishtaligini ta’minlash, kriminogen vaziyatni barqarorlashtirish, aholini qish mavsumida energiya resurslari (elektr, tabiiy va suyultirilgan gaz, ko‘mir, issiq suv) bilan to‘liq ta’minlash hamda bu borada tegishli idora va tashkilotlar vakillarining mas’uliyatini oshirishga qaratilgan qator tadbirlar Surxondaryo viloyatining barcha hududlarida ham amalga oshirilib kelinmoqda.

Joriy yilning 15 dekabr kuni Surxondaryo viloyati IIB boshlig‘i Timur Ismailov boshchiligida soha mas’ullari hamda hamkor tashkilotlarning mutasaddilari ishtirokida ijtimoiy soha ob’ektlari, shifoxonalar, ko‘p qavatli uylardagi issiqlik bilan ta’minlovchi korxonalar faoliyati bilan yaqindan tanishildi. U yerdagi mavjud imkoniyat va sharoitlar o‘rganilib aniqlangan kamchilliklarni bartaraf etish yuzasidan mutasaddilarga tegishli topshiriqlar berildi.

O‘rganish davomida Denov tuman Hududiy elektr tarmoqlari bo‘limi filialida tashkil qilingan viloyat kuz-qish shtabida amalga oshirilayotgan ishlar samaradorligi ko‘zdan kechirildi.

Hududlarda hamkor tashkilotlar bilan birgalikda ko‘p qavatli uylar, shaxsiy xonadonlar va jamoat joylarida video-kuzatuv qamrovini oshirish, kriminogen vaziyatni chuqur tahlil qilish, profilaktika inspektorlari tomonidan aholi muammolarni o‘rganish hamda bartaraf etish bo‘yicha “mahalla yettiligi” bilan yaqindan hamkorlikni yo‘lga qo‘yish, tungi vaqtlarda har qanday ko‘rinishdagi ko‘ngilsiz hodisalarning oldini olish, jamoat  tartibini saqlash borasida amalga oshirilayotgan chora-tadbirlarga qaratilib, tungi xizmatga jalb qilingan xodimlar bilan yo‘riqnoma o‘tkazildi.

Ishchi guruh a’zolarining kundalik o‘rganish ishlari viloyatning barcha hududlarida ham davom etmoqda.