Jarqo'rg'on tumani 3-sektor hududida, "Sog'lom va barkamol oila" shiori ostida musobaqa o'tkazildi
Mamlakatimiz bo'ylab Ichki ishlar vaziri sovrini uchun "Sog'lom va barkamol oila" shiori ostida 3-sektor hududidagi oilalar o'rtasida sport musobaqalari va kitobxonlik bellashuvlari o'tkazib kelinmoqda.
Shu munosabat bilan Jarqo'rg'on tumanidagi 19-sonli umumta'lim maktabida 3-sektor hududidagi mahallalarda istiqomat qiluvchi oilalar o'rtasida ana shunday musobaqalar bo'lib o'tdi.
Ushbu musobaqalarning ochilish marosimida, tuman Ichki ishlar bo'limi boshlig'i Sh.Allamurodov ishtirok etib, tadbir ishtirokchilarni qutladi va bugungi tadbirlarda faol ishtirok etishga chorladi. Shundan so'ng tadbirlarga start berilib, 19-sonli umumta'lim maktabi sport zalida sport musobaqalari bellashuvlari bo'lib o'tgan bo'lsa, maktabning faollar zalida kitobxon oilalar o'z mahoratlarini sinovdan o'tkazdilar.
Mazkur musobaqa va bellashuvlar ikki yo'nalish bo'yicha o'tkazilib, sektor hududidagi oilalar bellashuvida har bir yo'nalish bo'yicha g'oliblar saralab olindi.
Sportning "quvnoq startlar", "stol tennisi", "shaxmat", "shashka" hamda "badminton" turlari bo'yicha "Sog'lom va barkamol oila" musobaqasi, kitobxonlik hamda ma'naviyatni targ'ib etuvchi "Eng yaxshi ma'naviy etuk oila" shiori ostida: kitobga oshnolik, bahru bayt aytishuv, o'zi sevgan asar qahramoni haqida ma'lumotlar berilib, Temur tuzuklari kitobi asosida tuzilgan savol-javoblar viktorinasi bo'lib o'tdi.
Murosasiz va keskin bahslarga boy tarzda kechgan tadbir yakunida hakamlar hay'ati tomonidan g'oliblar aniqlanib, tuman Ichki ishlar bo'limi boshlig'ining diplomi hamda qimmatbaho sovg'alari bilan taqdirlandilar. Sektor hududida birinchi o'rinni egallagan ikkita oila vakillari musobaqalarning viloyat bosqichida ishtirok etadigan bo'lishdi.
