Ta’kidlash joizki, Davlatimiz rahbarining tashabbusi bilan keyingi yillarda sohani xalqparvar tizimga aylantirishga qaratilgan ko‘plab normativ-huquqiy hujjatlar qabul qilindi. Buning natijasida ichki ishlar organlarining jinoyatchilikka qarshi kurash, uning oldini olish, jamoat tartibini saqlash va fuqarolar xavfsizligini ta’minlash, aholining huquqiy ongi va madaniyatini oshirish borasidagi roli tobora oshib bormoqda. Eng muhimi, ichki ishlar organlari xodimlarining xalq ichiga kirib borishlari sezilarli darajada o‘sib borishi kuzatilmoqda.

Surxondaryo viloyati  IIB boshlig‘i polkovnik A.S.Ismoilov huzurida  2023 yilning 12 oyi davomida Denov tumanida jinoyatchilik va huquqbuzarliklarga qarshi kurashish, uning oldini olish borasida amalga oshirilgan ishlar muhokamasiga bag‘ishlangan yig‘ilishda ham  ayni jihatlar e’tirof etildi. Shu bilan birga o‘tgan bir yil davomida bu borada yo‘l qo‘yilgan xato va kamchiliklar chuqur tahlil qilindi. Viloyat va Denov tumani mas’ullari ishtirok etgan muhokamada  har bir hududni, mahallani jinoyatdan holi manzilga aylantirish borasida hamkorlikda amalga oshirish lozim bo‘lgan takliflar o‘rtaga tashlandi.

Negaki, har qanday huquqbuzarlik holatlarining oldini olish borasidagi harakatlar avvalo, mahallalarda keng jamoatchilik ishtirokida tashkil etilishi alohida ahamiyat kasb etadi. Shu bois har bir profilaktika inspektori “Mening mahallamda jinoyat sodir bo‘lmasligi kerak” shiori ostida harakatlanishi va bu borada kerak bo‘lsa, qo‘shimcha kuch va vositalarning ko‘magida amaliy ishlarga qo‘l urishi lozimligi ta’kidlandi.

Tanqidiy-tahliliy ruhda o‘tgan yig‘ilishda,  o‘tgan bir yil davomida yo‘l qo‘yilgan xato va kamchiliklarni bartaraf etish, jinoyatchilikni oldini olishda mahallabay, fuqarobay ish tizimidan foylanish va boshqa vazifalar bo‘yicha zarur chora-tadbirlar belgilab olindi.